Welkom in Zuidhorn, Wonen, Winkelen, Westerkwartier

Kieken deur kienderogen

Door : Coby Poelman-Duisterwinkel
Datum : 23 mei 2022
2021-08 coby3

Aduard is gerenoveerd, even kijken hoe dat overkomt op kinderen....

Ons dochter kwaam ons verrassen deur met de baaide jonkjes n dagje bie opa en oma te kommen. Ze waren nog moar net op stee of jongste vroug oma al of ze de kovvie opdrinken wol want den wollen ze wandelen, net as leste keer dat ze bie ons waren.

Ik legde uut dat we eerst nog even eten wollen want t was net twaalf uur west toen ze kwamen.

Ze aten lekker t gebakje op dat ons zeun nog even gaauw kocht haar, hai was der ook op oaf kommen.

Baaiden wollen ze ain met n sukkeloadje op de slagroom. Dai wer der eerst oaf eten en toen haar de jongste al genog. Oldste mog van hom de rest wel opeten, hai wol speulen.

Noa t eten gingen wie op pad. Kiender wollen eerst noar speultoen met de grode boze wolf.

Doar waren ze leste keer ook west en dat was bliekboar goud bevallen.

De noam kwaam van een bordje met een hond erop woar een dampende keurel achter legd was.

Ien dizze speultoen magen honden gain dampende keurels leggen. Zai maiken der n grode boze wolf van.

t Geluk duurde nait laang want n buurtbewoner begon zien toenpad met vergif te bespuiten en dat leek ons gain gezonde lucht veur ons allemoal.

Op noar de volgende speultoen. Bie de soamenwaarkende schoul op schoulplaain stonnen ook wat klimdingen mor leste keer waren der kiender aan t voetballen en nou was er gainain dus ook gaauw weer bekeken. Verder mor weer, opa wol ons dochter t nije plan even zain loaten en zo kwamen wie bie t sportveld weer uut. Doar waren ze aan t voetballen en aan t schreeuwen. Der waren ook wat boomstammen woar kiender op lopen konden en ze vlogen bie n bult omhoog en weer noar beneden.

Verder mor weer. Aauwerd het n mooie beweegtoen kregen. Hier konnen kiender zich vergoapen hou heur mamme en oom op toustellen klommen en met touwen zwaaiden. Kiender wollen t ook proberen. Met hulp van mamme en opa en oom konnen ze mooi metdoun. Bie t knoal laangs was ook nog wat mor jongste zee dat de stammen veur zien baintjes veul te ver uut mokoar lagen.

Toen kwamen wie bie de brug dai der altied was mor dai nou vot was. Jongste wol deur noar de nije brug mor wie bleven steken bie een grode schommel ien een boom woar baaide klaainkiender languut ien liggen konnen. Mamme aan ain kaant en oma aan aander kaant laiten ze hen en weer zwiepen.

Kiek, doar is joen mamme geboren en deur dat bovenste roam zwaaide ze heur pabbe uut as dai noar t waark ging. Dat was heur sloapkoamertje. Baaiden kwamen tegeliek omhoog om te kieken woar mamme wel nait geboren was en noar opa zwaaid haar.

Verder ging t weer. Wierum deur, noar t volgende speultoentje. Oma en jongste op de schommel, oldste ien een draaiding, opa op n kastje, oom aan t filmen, mamme draaide oldste ien t ronne.

Toen dai misselek van t draaien was wollen ze noar huus.

Haile optocht weer deur t dörp. Toen wie veur kerk langs kwamen wol opa klaainkiender toch nog even om t houkje kieken loaten toen hai zag dat kerk open was. t Haar wat vouten ien eerde dat er met kiender noar binnen mog mor uutaaindelek laiten de wachters ze toch deur. Opa was per slöt van reken joaren dioaken west ien dizze kerk en oma ollerling dus dat mos toch deurgoan.

Ik bleef met mien dochter mor even boeten op t hekje zitten.

Kiender waren onder iendruk van t hoge gebaauw en oom haar ze verteld wat ien een kerk gebeurde want kiender wollen wel even waiten wat mamme doar vrouger dee.

Nog n klaain eendje lopen en wie waren weer thuus. Noa zo’n lange wandeling is t lekker ijsco eten bie opa en oma ien toen. Dochter von dat t dörp wel mooi worren was. Kiender vonnen t wel vremd dat de stoepen ien onze stroat zomoar onderbroken werden deur stukken modder woar nog planten ien kommen motten. Pabbe en mamme haren ze leerd op stoep te lopen mor hou mos dat nou.

Misschain kommen der nog wel nije verkeersregels veur zuk soort wegen ien Aauwerd, wel zal t zeggen. Mor as je deur ogen van klaainkiender kieken is Aauwerd n mooi dörp met n baarg aaigenoaregheden.

 

Coby Poelman-Duisterwinkel

 

Stuur het door:
Deel via WhatsApp




Columns Zuidhorn